Pro 15 | NdeIBE | STEP | Impendulo ethobileyo iyaludedisa ulaka, kodwa ilizwi elilukhuni livusa ulaka.

Proverbs 15

1 Impendulo ethobileyo iyaludedisa ulaka, kodwa ilizwi elilukhuni livusa ulaka.

2 Ulimi lomuntu ohlakaniphileyo lukhulisa ulwazi, kodwa umlomo wesiwula uphihlika ubuphukuphuku.

3 Amehlo kaJehova asezindaweni zonke, alinde ababi labalungileyo.

4 Ulimi oluletha ukuphola luyisihlahla sokuphila, kodwa ulimi olukhohlisayo luyawephula umoya.

5 Isiwula siyakulahla ukulaya kukayise, kodwa owemukela ukuqondiswa uveza ukuhlakanipha.

6 Indlu yolungileyo igcwele inotho, kodwa inzuzo yababi ibehlisela uhlupho.

7 Izindlela zabahlakaniphileyo ziyalwandisa ulwazi, kodwa kazenzi njalo izinhliziyo zeziwula.

8 UJehova uyawenyanya umhlatshelo wababi, kodwa umkhuleko wabaqotho uyamthokozisa.

9 UJehova uyayenyanya indlela yababi, kodwa uyabathanda labo abalandela ukulunga.

10 Ukujeziswa okubuhlungu kumlindele ophambuka endleleni; ozonda ukuqondiswa uzakufa.

11 UKufa lokuBhujiswa kusobala phambi kukaJehova – pho-ke kangakanani izinhliziyo zabantu!

12 Isedeleli siyakuzonda ukuqondiswa; kasibuzi kwabahlakaniphileyo.

13 Inhliziyo ethokozayo yenza ubuso buchelese, kodwa inhiziyo ebuhlungu yephula umoya.

14 Inhliziyo eqedisisayo idinga ulwazi, kodwa umlomo wesiwula wongiwa ngobuthutha.

15 Zonke izinsuku zabacindezelweyo zilukhuni, kodwa inhliziyo ethokozileyo isendlini.

16 Kungcono ukuba lokulutshwana umesaba uJehova kulenotho enengi ulezinhlupheko.

17 Kungcono ukutsheba ngemibhida lapho okulothando khona, kulokudla inyama enonileyo okugcwele khona inzondo.

18 Ololaka oluvuthayo ubanga ukuxabana, kodwa umuntu obekezelayo uqeda inkani.

19 Indlela yevila igcwele ameva, kodwa indlela yomuntu olungileyo ikhamisile.

20 Indodana ehlakaniphileyo iletha intokozo kuyise, kodwa indoda eyisiwula yeyisa unina.

21 Ubuthutha bujabulisa umuntu ongelangqondo, kodwa umuntu olokuzwisisa uhamba ngendlela eqondileyo.

22 Amaqhinga ayehluleka uma kungelazeluleko, kodwa ayaphumelela ngabeluleki abanengi.

23 Umuntu uyathokoza ngokupha impendulo eqondileyo – yeka kuhle kangakanani ukuzwa ilizwi elifaneleyo!

24 Indlela yempilo iyimpumelelo kohlakaniphileyo ukuze angalengeli engcwabeni.

25 UJehova uyayibhidliza indlu yomuntu oziphakamisayo, kodwa indawo yomfelokazi kayiyikuncitshiswa.

26 UJehova uyayizonda imicabango yababi, kodwa leyo eyabalungileyo iyamthabisa.

27 Indoda eyisihwaba iluhlupho kwabendlu yayo, kodwa lowo ozonda ukufunjathiswa uzaphila.

28 Olungileyo uyayihlolisisa impendulo engakaphenduli, kodwa umlomo womubi ukhihliza okubi.

29 UJehova ukhatshana kwabangalunganga, kodwa uyezwa umthandazo wabalungileyo.

30 Ubuso obubobothekayo buletha intokozo enhliziyweni, lezindaba ezinhle ziqinisa umzimba.

31 Lowo olalela ukukhuzwa okumphilisayo, uzahlala kuhle labahlakaniphileyo.

32 Lowo onganaki ukulaywa uyazeyisa yena ngokwakhe, kodwa onanza iziqondiso uzuza ukuzwisisa.

33 Ukumesaba uJehova kufundisa umuntu ukuhlakanipha, njalo ukuzithoba kwandulela udumo.